【"दैवी शक्तीचे गुण"】

महानत्यागी बाबा जुमदेवजींनी प्राप्त केलेली दैवी शक्ती म्हणजे नेमकी कोणती शक्ती हा प्रश्न बहुतेक सेवकांना पडत असेलच.

■ सर्वप्रथम आपण दैवी शक्ती म्हणजे नेमकी कोणती शक्ती हे जाणुन घेऊया.

दैवी शक्ती म्हणजे ती शक्ती जी समस्त विश्वाचे सुत्र संचालन करते. ज्या शक्तीला आकार नाही, रूप नाही किंवा गंध नाही. ती शक्ती निराकार आहे व २४ तास जागृत आहे. याच शक्तीला महानत्यागी बाबा जुमदेवजींनी प्राप्त केले. ज्या शक्तीला सर्व मानव परमेश्वर, ईश्वर, परमात्मा, भगवान अशा विविध नावाने ओळखतात.

■ दैवी शक्तीचे गुण कोणते?

आपण दैवी शक्ती कोणती व ती कशी आहे हे जाणुन घेतले. आपण आधी पण परमेश्वराला मानत होतो व त्याची पुजा देखील करत होतो. पण आपण त्याची आकारात पुजा करीत होतो. कारण आपण त्या शक्तीला झाडा-माडात किंवा दगडात शोधत होतो. पण बाबांनी आपल्याला खरा परमेश्वर कुठे आहे हे दाखवुन दिले व आपल्या आत्म्यातील चैतन्यमय दैवी शक्तीला जागृत करून आपल्याला त्याची ओळख करून दिली.

आज आपण त्या परमेश्वराला फक्त मानतच नाही. तर जाणतो देखील...

तर त्या दैवी शक्तीला तर कोणताही आकार नाही, गंध नाही किंवा रूप नाही. ती निराकार आहे. ती दैवी शक्ती दिसत नाही, पण तिचे गुण दिसतात. बाबांनी त्या दैवी शक्तीला प्राप्त केले, पण बाबांना पण त्या दैवी शक्तीचा एकच डोळा संपुर्ण विश्वाला पुरून उरलेला असा दिसला. मग त्या दैवी शक्तीच्या आकाराची आपण कल्पना देखील करू शकत नाही, ती निराकार आहे.

पण भगवंत कसा आहे? कोण आहे? भगवंत कसा दिसतो? या सर्व प्रश्नांची उत्तरे बाबांनी आपल्याला भगवंत गुणांच्या ३ शब्दांत दिलेले आहे. ते ३ शब्द म्हणजे सत्य, मर्यादा, प्रेम...

हे ३ गुण म्हणजे त्या दैवी शक्तीचे आहेत. बाबांनी म्हटले आहे की,

"त्या दैवी शक्तीला जे पाहिजे होते, ते मी दिलं. म्हणुन त्या शक्तीने मला साथ दिला. अन्यथा मला साथ दिला नसता"...

तसेच भंडारा जिल्ह्यातील धोंप या गावी बाबा निराकार मध्ये असतांना मार्गदर्शन झाले की,

"यह कलयुग है। भगवान ने बाबा को मानव को जगाने के लिए भेजा है। युग परिवर्तन होने वाला है। बाबा हर सेवक से सत्य, मर्यादा और प्रेम की भीख मांगते है।" इतके म्हणताच बाबा रडायला लागले व थोड्या वेळाने बाबा म्हणू लागले की,

"बाबा नही रो रहे, भगवान रो रहा है। आप भगवान को भीख दो।"

यावरून आपल्याला कळते की भगवंताचे व भगवंताला आवडणारे गुण म्हणजे सत्य, मर्यादा, प्रेम...

हे भगवंताचे गुण आपल्याला अनुभवातून दिसतात. जो तत्व, शब्द, नियमांचे आचरण करतो ती दैवी शक्ती त्या सेवकाला प्रत्येक संकटात मदत करते.

"जेव्हा झटते सेवकांचे मन तत्व-शब्द-नियमांसाठी, तेव्हा ती दैवी शक्ती असते सदैव सेवकांच्या पाठी"...

जीवन जगणे ही एक कला आहे. या कलेचे अनेक पैलु आहेत. त्याचा मुख्य पैलु म्हणजे सुंदर आणि सुरेख विचारांचा फुलोरा मनात सातत्याने फुलवत ठेवणे हा होय.

तर आपले आचरण सत्य, मर्यादा, प्रेमाचे असले की, आपले विचार चांगले होतात.

मनुष्याचा गौरव हा त्यांच्या विचारांतच असतो. म्हणून सेवकांनी नेहमी असे प्रयत्न करावे की आपले विचार चांगले होतील.

काही चुकले असल्यास क्षमा करावी.

■ लेखन :- रवि नारायणजी मेश्राम

■ पत्ता :- बी-५२, शिवछत्रपती नगर, कामठी, जि. नागपूर

■ सेवक नंबर :- ४०५४

■ परमपूज्य परमात्मा एक सेवक मंडळ, वर्धमान नगर, नागपूर

◆ सोशल मीडिया प्रकाशन : Parmatma Ek News & Info