【"विज्ञान आणि मानवधर्म"】

फरक व साम्य...

आजचे युग हे विज्ञान युग आहे व आजची वर्तमान पिढी विज्ञानावर जास्त विश्वास करते. तसे बघितले तर धर्म आणि विज्ञान हे प्रत्येक मनुष्याच्या जीवनात समान रुपात प्रभावशाली आहे.

विज्ञान आपल्याला प्रगतीपथावर नेऊन विकासाशी आपला साक्षात्कार घडवितो, तर महानत्यागी बाबा जुमदेवजींनी स्थापन केलेला "मानवधर्म" आम्हाला मोक्षप्राप्तीच्या मार्गावर नेऊन सत्कर्माच्या माध्यमातून परमेश्वरी गुणांचे साक्षात्कार घडवितो. म्हणुन विज्ञान आणि मानवधर्म हे एकमेकांचे पूरक आहेत, पण दोघांचेही स्वरूप व कार्यक्षेत्र वेगवेगळे आहे. विज्ञानाला मानवधर्माची साथ नाही मिळाली तर तोच विज्ञान मानवी जीवनाकरिता विध्वंसक ठरतो.

विज्ञान आणि महानत्यागी बाबा जुमदेवजींनी स्थापन केलेला मानवधर्म यातील फरक आणि साम्य बघुया.

■ विज्ञान व बाबांचा मानवधर्म

विज्ञान कोणत्याही चमत्काराला मानत नाही व विज्ञान हा तथ्य आणि प्रयोगांवर आधारित असतो. महानत्यागी बाबा जुमदेवजींनी स्थापन केलेला मानवधर्म देखील चमत्काराला मानत नाही. म्हणून आपल्या मार्गात कोणालाही "आशिर्वाद" मिळत नाही, "तुज आहे तुजपाशी, परी तु जागा भुललाशी" याप्रमाणे मानवधर्माची कार्यप्रणाली आहे. बाबांनी कोणाच्याही डोक्यावर हात ठेवून "जा बच्चा! तेरा कल्याण हो जाएगा" असे म्हटले नाही, कारण बाबांचा मानवधर्म हा कर्मप्रधान आहे व इथे चमत्कार घडत नाही, तर प्रत्यक्ष अनुभवातून दैवी शक्तीच्या गुणांचा साक्षात्कार घडतो.

मानवधर्मात पण चमत्कार न होता प्रयोग होतो, पण हा प्रयोग त्या दैवी शक्तीवर असलेला विश्वास व मानवाच्या स्वतःच्या कर्मानुसार सफल किंवा निष्फळ ठरत असतो. ज्याप्रमाणे विज्ञानात विविध रासायनिक अभिक्रियेतून एखादा आविष्कार करण्याचा प्रयोग केला जातो, त्याचप्रमाणे बाबांच्या मानवधर्मात तत्व, शब्द, नियमांच्या आध्यात्मिक अभिक्रियेतून माणसात माणुसकी निर्माण करण्याचा प्रयोग केला जातो.

जेव्हा-जेव्हा मानव विज्ञानाचा आधार घेऊन कुमार्गाने चालायला लागतो व स्वतःच्या चुकांमुळे स्वतःवर दुःख ओढवून घेतो, तेव्हा-तेव्हा त्याला योग्य मार्गावर येण्याकरिता, स्वतःवर ओढवलेले कर्मभोग नष्ट करण्याकरिता व मानवी जीवनाचा अर्थ समजण्याकरिता या महानत्यागी बाबा जुमदेवजींच्या मानवधर्माची आवश्यकता पडते. आज जरी विज्ञानामुळे आपल्याला कमी वेळात सर्व काही भौतिक सुख सहज मिळते, पण मिळविलेले अन्न सुखाने कसे खाता येईल हे माझ्या बाबांचा मानवधर्मच शिकवितो.

★ विज्ञान पालनहार आहे, तर माझ्या बाबांचा मानवधर्म हा तारणहार आहे.

★ विज्ञान भौतिक सुख देतो, तर माझ्या बाबांचा मानवधर्म आत्मिक समाधान देतो.

★ विज्ञानाचा अंत जिथे होतो, तिथूनच मानवधर्माची उत्पत्ती होते.

★ विज्ञान परमाणु शक्ती आहे, तर बाबांचा मानवधर्म आध्यात्मिक शक्ती आहे.

★ विज्ञान असिमीत शक्तीचा भंडार आहे, तर बाबांचा मानवधर्म त्या सर्व शक्तींचा स्रोत आहे.

★ विज्ञान मानवाचा बाह्य विकास करतो, तर बाबांचा मानवधर्म मानवाचा आंतरिक विकास करतो.

★ विज्ञान परमाणु शक्तीचे बळ आहे, तर मानवधर्म आत्मशक्तीचे बळ आहे.

★ विज्ञान आपले उद्दिष्ट साध्य करण्याकरिता कोणत्याही आड मार्गावर चालतो, पण मानवधर्म आपली उद्दिष्टे साध्य करण्याकरिता नेहमी सत्कर्माच्या मार्गावरच चालणे शिकवितो.

★ विज्ञान एक वरदान आहे, तर मानवधर्म आत्मज्ञान आहे.

आज विज्ञानाच्या प्रयोग व आविष्काराच्या साहाय्याने मानवाने निसर्गातील अनेक रहस्य उजागर केलेत, पण तरी आजही असे कित्येक रहस्य आहेत जिथपर्यंत विज्ञान कधीही पोहचू शकला नाही. शेवटी विज्ञानाने पण मान्य केले की, एक अशी शक्ती या जगात नक्कीच आहे जी सर्व विश्वाचे सूत्र संचालन करते व तीच शक्ती सर्व शक्तीचे केंद्र आहे. ती शक्ती म्हणजे "दैवी शक्ती". जी शक्ती महानत्यागी बाबा जुमदेवजींनी प्राप्त केली व आपण सर्व सेवक त्या दैवी शक्तीला भगवान व परमेश्वर म्हणतो.

आपलं शरीर हे भौतिक आहे, म्हणून त्याच्या सुख-सुविधेचे साधन आपण भौतिक विज्ञानाद्वारे प्राप्त करू शकतो. पण आपल्या शरीरात असलेली आत्मा तर चैतन्य आहे. आत्म्याची आवश्यकता मानवधर्माच्या साहाय्यानेच पूर्ण होऊ शकते. विज्ञान हे मानवाला जीवन जगण्याचे व सुखसोईचे साधन उपल्बध करून जीवन जगायचे कसे हे सांगतो, पण मानवधर्म प्रत्येक मानवाच्या मनात जगण्याची प्रेरणा निर्माण करतो. म्हणून आजही या विज्ञानयुगात बाबांनी स्थापन केलेल्या मानवधर्माला अनन्यसाधारण असे महत्व आहे.

म्हणुन विज्ञान आणि मानवधर्म हे मानवांकरिता समान महत्वाचे आहेत.

★ लेखन :- रवि नारायणजी मेश्राम

★ पत्ता :- बी-५२, शिवछत्रपती नगर, कामठी, जि. नागपूर

★ सेवक नंबर :- ४०५४

◆ सोशल मीडिया प्रकाशन : Parmatma Ek News & Info