सामाजिक बांधिलकी आणि साधेपणाचा आदर्श घालत महानत्यागी बाबा जुमदेवजी द्वारा स्थापित परमपूज्य परमात्मा एक सेवक मंडळ, वर्धमान नगर, नागपूर च्या वतीने रविवार, दिनांक ०७ डिसेंबर २०२५ रोजी नागपूर परिसरातील वाठोडा येथे आयोजित करण्यात आलेल्या मानवधर्माचे भव्य सेवक संमेलन कार्यक्रमाचे औचित्य साधून ५ जोडप्यांचा सामूहिक विवाह सोहळा मोठ्या उत्साहात पार पडला. 'अनावश्यक खर्च टाळा आणि समाजाला दिशा द्या' या उद्देशाने राबवण्यात आलेल्या या उपक्रमाचे सर्वत्र कौतुक होत आहे.

धार्मिक वातावरणात मंगलमय सोहळा वाठोडा येथील एन.आय.टी ग्राउंडवर आयोजित भव्य सेवक संमेलनाच्या निमित्ताने हा विवाह सोहळा पार पडला. हिंदू रीतीरिवाजाने ५ जोडपी विवाहबंधनात अडकली. यावेळी परिसरातील नागरिक आणि वधू-वरांचे नातेवाईक मोठ्या संख्येने उपस्थित होते.

केवळ लग्न लावून न थांबता, या नवदाम्पत्यांच्या नवीन संसाराची सुरुवात सुखाची व्हावी याकरिता आयोजकांतर्फे तर्फे त्यांना विशेष भेटवस्तू देण्यात आल्या. यामध्ये आलमारी, दिवाण, गादी, ब्लँकेट, LED टीव्ही, मिक्सर ग्राईंडर, सीलिंग फॅन, किचन रॅक, किचन सेट इत्यादी वस्तूंचा समावेश होता. वाठोडा परिसरातील परमात्मा एक सेवकांच्या या मदतीमुळे वधू-वरांच्या कुटुंबांना मोठा आर्थिक आधार मिळाला आहे.

याप्रसंगी नागपूर मंडळाचे अध्यक्ष श्री. रविंद्रजी गायधने यांनी ह्या सामाजिक उपक्रमाचे कौतुक केले. यावेळी मंडळाचे पदाधिकारी, संचालक, ज्येष्ठ मार्गदर्शक, मार्गदर्शक, कार्यकर्ता, युवा सेवक, स्वयंसेवक, सेवक - सेविका, आयोजन समिती व परिसरातील नागरिक मोठ्या संख्येने उपस्थित होते.

हा कार्यक्रम यशस्वी करण्यासाठी वाठोडा नागपूर परिसरातील मार्गदर्शक, कार्यकर्ता, सेवक, सेविका व स्वयंसेवकांनी विशेष परिश्रम घेतले.

नमस्कार...